Ég vissi það, það þurfti bara örlítið að ýta við laxaguðunum með örlitlum kolíslenskum bölmóð til þess að þetta myndi hrökkva í gang.

Nú er sko bjart framundan, upp upp mín sál og upp á land með laxinn!

Í síðasta pistli minntist ég á að vonin lægi í Jónsmessustraumnum og sú von rættist aldeilis.

í gærkveldi færðist líf í tuskurnar á Austurbakka Hólsár þegar stór ganga kom inn og menn lentu í fínni veiði undir kvöld. Eða réttara sagt maður, Knútur Lárusson var einn að veiða vegna forfalla og snaraði hann á land fimm fiskum einn og sjálfur. Þetta voru gríðarvel haldnir laxar frá 10-12 pund. Í Eystri urðu menn líka varir við meira líf í gærkvöldi og þar kom á land stærsti lax sumarsins sem við vitum um eða 96 cm.

í morgun var svo áfram gott líf í Hólsá en þar misstust nokkrir laxar, einn kom á land og auk þess nokkuð af sjóbirting.

Veiðikveðja

Jóhann Davíð – johann@kolskeggur.is